Пичи дыръяз со Сьодмуртчи шурысь оз поталля, пужен коня меда чорыг кутылиз; эшъёсыныз чош гольык пыд бызьылиз урам кузя но возьёс вылти, со вакытэ гуртын садик ой вал уго. Кисьмам узы-борыез нырысьёссэ одно ик анаезлы вайылиз – чапак Анна Плотниковалэн кырзаназ кадь. Бадзымгес будэмез бере эшъёсыныз чош турын жутон дыръя колхозлы юрттиз, ю-нянь октыку-калтыку сортировкаын ужаз, сизьыл чошатскыса картофка октиз, бадзым классъёсын дышетскыкуз кунян но сюдиз, скал но кыскиз – со ужъёсты быдэсъязы школаысь производственной бригадае пыриськисьёс, нокыче ужлэсь но оз кышкалля. Школа но семьяез юрттизы улон сюрес вылэ йыг-йыг султыны.

               Можгаысь медучилищеез йылпумъяса егит онерчи ужаны ыстэмын вал Селычка санаторие, кытын пиналъёслэсь тазалыксэс юнматон бордын тыршиз. Нош куке Биялан ужаны луонлык кылдиз, вордиськем гуртаз бертиз. Дышетскиз со трос тодись-валась но быгатись онерчилэсь Раиса Федоровна Бурковалэсь, бия калыклэн одигезлэсь яркыт кизилиезлэсь, жаляса верано луэ, та кышномурт поламы овол ни. Нош Танюшалэн, Татьяна Васильевналэн, фельдшер луыса ужамез кызь арлэсь ортчиз ни.

              Эмъян удысын ужаны капчи овол, тужгес но али – коня койкаос кулэстэмын, стационаръёс ворсамын, нош висисьёс уг кулэсмо. Чукна тямыс часысен кутскыса нуназе бере ньыль часозь со ялан пыд йылаз. Профилактической ужен выре – соиз, оло, самой капчиез. Сизьыл-тулыс кынман висенъёсын вазиськисьёс трос, нош коня мойыос суйзы-пыдзы висьыса эмъяськонние лыкто. Висисьёслы я эмъюм гожтоно, я укол пуктылоно, вылысь эмчиослэн косэмзыя капельницаос но лэсьтылэ. Быдэстэм ужъёссэ журналэ гожтыса кельтоно на. Ай дораз бертэмез бере но, висисьёс доры мынтэк уг лу, куддыръя уйин но – гуртын ужась эмчиослэн улонзы син азьын. Висён ласянь котькуд юанлы Татьяна Васильевна рос-прос валэктон сётоз: эмъюмлэсь аннотацизэ учкоз, вералоз, ку но, кызьы юоно, марлэсь возиськоно. Фельдшермы котьку капчи вазиське, сюлмысьтыз сомында шуныт лыктэ, соку ик оскон кылдэ жоген бурмод шуыса, мылкыд жутиське. «Та Татьяна Васильевнамы, врачлы дышетскытэк но, соос мында ик тодэ, дыр», - мойыослэсь куспазы таче вераськемзэс кыли. Тазьы верам, мон малпамъя, выли дунъет луэ, озьыен, шедьтиз нылкышно улонын аслэсьтыз орзэ.

           Вань таче визьмо веран: уже, пе, тон шумпотыса мед мынод, нош ужысь бурдъяськыса мед бертод. Танюша дораз нунал куспын жадемзэ вунэтыса вуэ, угось татын сое нылпиосыз витё – кык нылъёсыз но пиез, бергес картэз но ужысь бертэ. Кузпалыз, Ваня, тракторен ужа, ужез капчи овол, быдэс нунал колесаос вылын. Колхозын солэсь нимзэ азьмынись механизаторъёс радын верало. Оскисько, та йоно семья нылпиоссэ но азьлань улонзылы зеч дасялоз, соос умойтэм ужъёсын уз выре, анай-атайзылэсь адзем карозы.

           Бадзым тау карыны кулэ Татьяна Васильевналэн анай-атаезлы, Людмила Егоровна но Василий Степанович Бушковъёслы, таче шаплы, визьмо, зег нянь кадь небыт сямо, оскымон ныл будэтэмзылы. Соос нылзылэн семьяеныз кечевыл уло, тазалыксы мед луоз кема аръёс чоже уртче улыны-вылыны, внукъёссылэн азинсконъёссылы шумпотыны.

            Эшшо одиг эмчи сярысь вакчияк вераме потэ. Раиса Федоровна пенсие потэм бере ми дорын ужаз зуч нылаш Надежда Михайловна Рябова, со котькуд нунал Водзиысь ветлэ вал. Синмаськоно солэн но ужамезлы, быгатыса укол пуктылэ, ноку шарае уг потты урод мылкыдзэ, улонын котькыче учыръёс луо ке но. Тунсыко соиз:  туннэ та кышномурт вала но тодэ ни удмурт кылэз. Надежда Михайловна песянай луиз ини, аслэсьтыз кадь ик яратыса будэтэ сузэрезлэсь нылзэ.

            Таче лякыт, гуртооссылы  сюлэм шунытсэс жалясьтэм нылкышноослэн коркаосазы котьку шуныт мед луоз, лымы-а пельтэ, зор-а кисьтэ мылкыдзы шумпотонэн мед пачылалоз. Вуись Выль ар соослы бадзым шудбур, юн тазалык, семья куспазы яратыса но ог-огзэс валаса улон мед ваёз.

                                                                      Т.Коркина, Выль Бия гурт